Psa 19 | KYG | STEP | Koku'nate'mo hane'niya ya'mo'a Goti ha le konali ya'ae'mo aeno hakalo huno hapa nepaiye. Koku'na'mo'a Goti alagepa ali'ya'amo alino apave neliye.

Psalms 19

Goti'a alo hu'niya ya'mo'mo ala agi'amo ne'amiya gemae

1 Koku'nate'mo hane'niya ya'mo'a Goti ha le konali ya'ae'mo aeno hakalo huno hapa nepaiye. Koku'na'mo'a Goti alagepa ali'ya'amo alino apave neliye. 2 Feluga'e feluga'e'mo ge nehuno'ae'mo hani'ilaga'e hani'ilaga'e'mo hu'a agete'a afisayafe'mo alino apave neliye. 3 Muki ma mopafi'mo mai'ne'a alu apake alu apakemo ne'aiya vaya'mogimo koku'nate hane'niya ya'mo ava gemo ne'afiye. Ava gemo o'afi'naya vaya'mo mago o'mai'nae. 4 Koku'nate hane'niya ya'mo ava gemo muki haopalega mopamo lole'e lole'e atupalegamo aino atagu faelino uneno hulino u'niye. Goti'a yegemo no'amo koku'napi'mo ki male'niye. 5 A'mo aligefe'mo nehaya vaya'mogi no'apimo atale'a apamogaga aime aime ne'vaya kava huno yegemo'mo haineno nelamiye. Apayamufa vaya'mogimo u'a ae'a apakasesayafe'mo nagu nagu hu'a ne'vaya kava huno yegemo'mo haineno nelamiye. 6 Yegemo'a koku'na'mo aepalegati'mo haineno atupalegamo nelamiye. Yegemo nelegeno'ae'mo mago amuko nosiya aupilagamo ohane'nifa muki aupilaga'amo alagi leno amuko huno ne'ate.

7 Ala kava ne'mo ke'aepa ge'amo kanale alagepa gemo hane'neno apakupi mafa'nemo alino alagepa huno ne'ate. Ala kava ne'mo faigoko ge'amo'mo aino ataginovano nosifa alagepa huno hane'neno'ae'mo o'age'naya vaya'mo alino apaya male'nige'a apakesamo ne'afiye. 8 Ke'aepa gemo api gemo hane'nige'a ne'afiya vaya'mogi apamogaga ne'aiye. Ani kava hiyo, ina kava osiyo, huno hu'niya gemo hosu gemo ohane'nifa alagepa ge'age'mo hane'neno apaulagamo alino ayakeno apateteno alino alagepa huno ne'apate. 9 Ala kava nefeke'mo koli hute'a mono nehaya kava'mo yaveyave kava'mo hane'neno muki afina'mo hanege hanege huno hanegaiye. Ala kava ne'mo'a alino fako huno ne'apateya gemo alagi lama ge'age'mo hane'neno fatago gemo hane'niye. 10 Alopa monie'mo hapa'ye nehiya kava hu'a ge'amo afisayafe'mo mago'e huno hapa'ye hisiya agufa gemo hane'niye. Mago'e huno haga'age gemo hane'neno kevegeve anumo'mo nehiya haga'amo ago aeno agaseno hane'niye. 11 Gekamo'mo, ehekae, huno nehige'nae'mo ali'yakamo ne'aluva vekamo'namo afite'nae'mo atete nehuve. Gekamo akame nehaya vaya'mogimo alopa miya'apimo aligae.

12 Muki vaya'mogimo muki hosu kava'apifati'mo ae'a kasalo nepaya kava'apimo alagepa hu'a afa'a o'agegae. Ala kava nene, hu'na, hosu kava'mo hane'niye, hu'na o'age'na hu'nova hosu kava'nimo aeka kalo paeka atalo. 13 Hosu kava'mo hane'niye, hu'na ago age'nova hosu kava'mo halate osisuvafe'mo natafauka nato fiku yanageno ani hosu kava'mo'a yagaino nategaiyanagi. Ani kava huka naha maesanage'nae'mo vai'mo o'ali'na hogote hosu kava'mo aeno agase'niya hosu kava'mo osuguve. 14 Ala kava nene, hu'na, miya faika nateteka himamu'nimo alika ne'namina veka'nimo mai'nane. Navayafati'mo nehuva ge'nimo ago afiteka naipafi'mo nagesamo ne'afuva kava'nimo kaulagafati'mo ago nagetekae'mo, alagepa kava'mo hu'nane, huka hisanafeke'mo ne'nahaiye.